C朗職業生涯總入球達到943球。
周三(10日)凌晨世界盃外圍賽歐洲區F組「雙牙大戰」，葡萄牙作客以3比2險勝匈牙利，保持2戰2勝，40歲巨星C朗寶刀未老，繼上仗射入世界波後，今仗主射12碼入網，以39球追平已退役危地馬拉名將卡路士雷斯嘅紀錄，並列世盃外史上最多入波球員，葡萄牙仲有4場世盃外，C朗好大機會超越卡路士雷斯，獨佔世盃外射手王寶座。
葡萄牙日前輕鬆大炒阿美尼亞5比0，但今仗遇上有利物浦中場蘇保斯拉爾助陣嘅匈牙利，陷入苦戰，上半場21分鐘失守，匈牙利前鋒班拿巴斯華加頂入打開紀錄。葡萄牙立即加強攻勢，創造大量機會，36分鐘祖奧簡斯路傳畀貝拿度施華勁射入網扳平。
換邊之後，C朗喺禁區內凌空射門，匈牙利後衞路斯尼高想攔截，反而犯手球，被判罰12碼，C朗親自主射入網，連續5次為葡萄牙上陣有波入，並將自己保持嘅國家隊最多入球紀錄增加至141球，職業生涯總入球達到943球，向千球大關又邁進一步。
戰至84分鐘，班拿巴斯華加再次頭槌破網，為匈牙利扳平2比2，但僅過2分鐘，葡萄牙就由貝拿度施華橫畀祖奧簡斯路射入致勝1球，呢位2位前曼城隊友仍然默契十足。賽後C朗喺社交網上載比賽相片話：「兩戰兩勝，葡萄牙加油！」非常滿意球隊表現。